Адрас райвыканкама: Рэспубліка Беларусь, Гомельская вобласць, 247095, г.п. Лоеў, вул. Леніна, 2

Тэлефон прыёмнай: 8 02347 4 22 10

E-mail: isp@loev.gov.by

Набярэжная р.Днепр
Набярэжная р.Днепр
Галоўная / Навіны / Навіны рэспублікі
15 мая 2019

Адзіны дзень Чырвонага Крыжа пройдзе 17 мая ў сталіцы і рэгіёнах Беларусі

Жыхары ўсіх абласных цэнтраў і Мінска змогуць азнаёміцца з асноўнымі напрамкамі работы БТЧК у час Адзінага дня Чырвонага Крыжа 17 мая, паведамілі БЕЛТА ў арганізацыі.

Кожны май Міжнародны рух Чырвонага Крыжа і Чырвонага Паўмесяца святкуе свой дзень нараджэння. У Беларусі таксама падрыхтаваны пералік мерапрыемстваў з 8 па 31 мая. Іх мэта - азнаёміць жыхароў з работай БТЧК па розных напрамках: развіццё валанцёрскага руху, падрыхтоўка і рэагаванне на надзвычайныя сітуацыі, навучанне першай дапамозе, распаўсюджванне ведаў аб міжнародным гуманітарным праве, аказанне медыка-сацыяльнай дапамогі дома і інш.

А 17 мая цэнтральнай падзеяй месяца стане Адзіны дзень Чырвонага Крыжа, калі ва ўсіх абласных і некаторых раённых цэнтрах краіны гасцей чакаюць карысныя гульні, квэсты, музычныя і фотапляцоўкі, майстар-класы, лекцыі, кансультацыі.

У Брэсце, напрыклад, на набярэжнай Ф.Скарыны разгорнуцца інфармацыйныя і інтэрактыўныя пляцоўкі, дзе можна давецца, як стаць валанцёрам, паўдзельнічаць у майстар-класах па аказанні першай дапамогі, змераць артэрыяльны ціск, індэкс масы цела, азнаёміцца з міні-праектамі клоўнатэрапіі і легатэрапіі, паглядзець фотаработы і выстаўку дзіцячых малюнкаў і г.д.

У Гродне на пляцоўцы Маладзёжнага цэнтра па вул. Савецкай валанцёры атрада хуткага рэагавання на надзвычайныя сітуацыі раскажуць пра сваю работу, прадэманструюць асноўнае абсталяванне. Таксама можна будзе разам з дзецьмі згуляць у тэматычную гульню аб правілах бяспечных паводзін. Валанцёры і работнікі Чырвонага Крыжа дадуць і шмат іншай карыснай інфармацыі: як знайсці сваякоў, якія зніклі ў выніку надзвычайных сітуацый або ваенных канфліктаў; як распазнаць ахвяру гандлю людзьмі і дапамагчы ёй; як засцерагчы сябе і асяроддзе ад заражэння ВІЧ/СНІД. Настрой зададуць музыканты духавога аркестра, а таксама сабакі-лекары, якія будуць задзейнічаны ў праграмах каністэрапіі. Завершыцца свята флэшмобам.

У Гомелі месцам збору стане летняя эстрада ў парку атракцыёнаў палацава-паркавага ансамбля. Праграма ўключае работу пляцоўкі здаровага ладу жыцця, культурна-забаўляльнай зоны з віктарынамі і конкурсамі, інфапалаткі і фотазоны, дэманстрацыю тэхнікі (усюдыхода Pinzgauer 712М), майстар-клас па аквагрыме, шоу валанцёраў-клоўнаў Чырвонага Крыжа.

Плошча Перамогі ў Віцебску аб'яднае наступныя інфазоны і актыўнасці: майстар-класы па аказанні першай дапамогі і клоўнатэрапіі, здаровы лад жыцця і прафілактыка ВІЧ, пляцоўку па гісторыі Чырвонага Крыжа, міжнародным гуманітарным праве, выстаўку абсталявання атрада хуткага рэагавання, пляцоўку па фандрэйзінгу (інфармацыя аб прыцягненні рэсурсаў Чырвонага Крыжа), канцэрт.

Падобныя актыўнасці разгорнуцца і ў Магілёве каля гімназіі нумар 3 (вул. Ленінская, 43). Акрамя таго, валанцёры ініцыятыўнай групы "Імпульс дабра" правядуць майстар-клас па скандынаўскай ходзьбе, будзе арганізавана выстаўка сувеніраў і літаратурная гасцёўня, дзе паэтасы з Магілёўскай абласной арганізацыі БТЧК прадставяць свае творы.

У Мінскай вобласці Адзіны дзень Чырвонага Крыжа праходзіць на працягу ўсяго мая. У прыватнасці, 15 мая ён адбудзецца ў Мядзеле і Чэрвені, 16-га - у Капылі, Уздзе, Вілейцы, Беразіне, Жодзіне. 17 мая мерапрыемствы плануюцца ў Барысаве, Крупках, Заслаўі, Салігорску і Маладзечне, 24 мая - у Валожыне і Слуцку.

У Мінску мерапрыемства пройдзе ў фармаце дабрачыннага свята для дзяцей са шматдзетных, няпоўных сем'яў, сем'яў, якія выхоўваюць дзяцей з інваліднасцю, а таксама для дзяцей з сацыяльна-педагагічных цэнтраў. На свята запрошаны больш за 200 чалавек. Для іх у батутным цэнтры Hero Park будуць прадстаўлены пляцоўкі па лега- і клоўнатэрапіі. Дзеці змогуць навучыцца аказваць першую дапамогу з удзелам лялек Чырвонага Крыжа Генры і Алесі, згуляюць у настольную гульню "Правілы бяспечных паводзін дома". Знадворку каля батутнага цэнтра таксама будзе працаваць забаўляльная пляцоўка для ўсіх жадаючых.

Навіны Беларусі (БЕЛТА)