Адрас райвыканкама: Рэспубліка Беларусь, Гомельская вобласць, 247095, г.п. Лоеў, вул. Леніна, 2

Тэлефон прыёмнай: 8 02347 4 22 10

E-mail: isp@loev.gov.by

Набярэжная р.Днепр
Набярэжная р.Днепр
Галоўная / Навіны / Навіны рэспублікі
1 2018

Праслухоўванне прэтэндэнтаў на ўдзел у адборы дзіцячага "Еўрабачання-2018" пройдзе 6 ліпеня

29 чэрвеня, Мінск /Кар. БЕЛТА/. Праслухоўванне прэтэндэнтаў для ўдзелу ў нацыянальным адборачным туры дзіцячага конкурсу песні "Еўрабачанне-2018" пройдзе 6 ліпеня ў Белтэлерадыёкампаніі, паведамілі карэспандэнту БЕЛТА ў прэс-службе медыяхолдынга.

Адбор праводзіцца ў адпаведнасці з Палажэннем, распрацаваным арганізатарам, і правіламі конкурсу, якія ўстанаўліваюцца Еўрапейскім вяшчальным саюзам. У адпаведнасці з палажэннем, тэрмін прыёму заявак для ўдзелу ў адборы заканчваецца 29 чэрвеня.

Як адзначылі ў прэс-службе, традыцыйна прэтэндэнты на ўдзел адпраўляюць свае бандэролі ў апошнія дні, і гэты год не стаў выключэннем. Па стане на 10.00 29 чэрвеня ў адрас арганізатараў паступіла каля 40 заявак, аднак гэта колькасць не з'яўляецца канчатковай. Як і мінулыя гады, Белтэлерадыёкампанія адводзіць люфт з некалькіх дзён для таго, каб усе адпраўленыя ва ўстаноўленыя тэрміны бандэролі паспелі паступіць на адрас медыяхолдынга і былі разгледжаны.

Сярод паступіўшых анкет як сольныя выканаўцы, так і калектывы, прычым некаторыя з іх ужо не першы раз спаборнічалі за права прадставіць Беларусь на міжнародным форуме.

"Акрамя заявак, у адрас Белтэлерадыёкампаніі паступае вялікая колькасць зваротаў кансультацыйнага характару адносна тых ці іншых пунктаў палажэння. Мы бачым, што актыўнасць нашых патэнцыяльных удзельнікаў даволі высокая і разлічваем на тое, што канчатковая колькасць бандэролей будзе не меншай, чым мінулыя гады. Так, у 2017-м і 2016-м гадах да праслухоўвання былі дапушчаны 45 удзельнікаў, у 2015-м - 41 юны выканаўца", - расказалі ў прэс-службе.

Ужо 6 ліпеня ў 12.00 патэнцыяльныя ўдзельнікі музычнага дзіцячага форуму змогуць прадставіць свае кампазіцыі на суд прафесійнага журы ў самай вялікай студыі на Макаёнка, 9 - студыі "600 метраў", абсталяванай па апошнім слове тэхнікі.

Да праслухоўвання будуць дапушчаны ўсе прэтэндэнты, чые заяўкі аформлены ў адпаведнасці з патрабаваннямі, пазначанымі ў палажэнні: удзел у адборы могуць прыняць юныя выканаўцы, якім на дату правядзення міжнароднага конкурсу павінна быць не менш за 9 і не больш за 14 гадоў, якія з'яўляюцца грамадзянамі Рэспублікі Беларусь або замежнымі грамадзянамі і асобамі без грамадзянства, пастаянна пражываюць на тэрыторыі Рэспублікі Беларусь не менш за два з палавінай гады; у адборы можа ўдзельнічаць песня, што складаецца з вершаў на беларускай і (або) рускай мове з выкарыстаннем замежнай мовы (але не больш за 40 працэнтаў аб'ёму тэксту) і музыкі, якія не былі камерцыйна рэалізаваны, а таксама выкананы публічна поўнасцю або часткова да 1 мая 2018 года. Удзельнік праекта павінен быць адзіным праваўладальнікам музыкі і тэксту песні або мець права сумеснага валодання музыкай і тэкстам песні, калі ў праекце прымае ўдзел калектыў выканаўцаў.

Праслухоўванне будзе праходзіць у рэжыме жывога гуку ў суправаджэнні музыкі і (або) фанаграмы, запісанай без вакалаў любога віду або якіх-небудзь вакальных імітацый.

Па выніках праслухоўвання прафесійнае журы вызначыць ад сямі да дзесяці канкурсантаў для ўдзелу ў фінале, які будзе праведзены не пазней за 15 верасня ў форме гала-канцэрта ў прамым эфіры тэлеканалаў "Беларусь 1" і "Беларусь 24".

Пераможца нацыянальнага адборачнага тура, які прадставіць Беларусь на дзіцячым "Еўрабачанні-2018" 25 лістапада ў Мінску, вызначыцца па выніках галасавання прафесійнага журы і тэлегледачоў.

Усе правы, што адносяцца да правядзення адбору, належаць выключна арганізатару - Белтэлерадыёкампаніі.-0-